رباعية.. استعد
رباعية.. استعد
هيييييه.. دنيا.. عدت سنة هوا.. وأدي الربيع- أقصد معرض الكتاب- عاد من تاني.. وآدينا طلعنا لكم تاني.. والمرة دي بأربعة في عين اللي ما يصلي على النبي..
أدرك أن الكثير إن لم يكن الكل! قد نسى الموضوع أساسا.. ولهذا أعيد ماسبق أن قلته هنا من عام..
أتحدث عن "سلسلة أول سطر" التي أشترك في تأسيسها خمسة من الشباب اللي زي الورد- إحنا يعني!- بغرض إصدار كتب متنوعة بالتعاون مع دار ليلى.. العام الماضي أصدرنا كتابين "الأطباء لا يقولون آه" لد.بستاني نعمان التلباني ، و "الإنسان أصله.. جوافة" لصاحب هذه المدونة – أنا يعني!-.. وكان لطيفا جدا أن نفدت الطبعة الأولى من الكتابين في معرض الكتاب الماضي..
هذه المرة هناك أربعة كتب دفعة واحدة
حنين لـ"أحمد عمار"
حب بلون البنفسج لـ"دعاء سمير"
يوميات مدرس في الأرياف لـ"حسام مصطفى إبراهيم"
عزيزي "999" لـ" محمد هشام عبيه"- اللي هو أنا برضه!-
همتكم معانا بقى..الكتب ستتواجد في بعض مكتبات وسط البلد ابتدءا من الأسبوع القادم إن شاء الله وكذا ستتوفر في جناح دار ليلى في معرض الكتاب القادم- اللي ما أعرفش هيبقى فين لغاية دلوقت.. الجناح مش المعرض-
ونوالي الأخبار والتفاصيل تباعا
صباح الفل
posted by محمد هشام عبيه | 7:47 ص
37 Comments:
صباح الفل والورد على شباب أول السطر .. سبحان الله برضه حجزت التعليق الأول ! .. ماشاء الله عليكم - طيب يا أخي قول الله أكبر .. بكرة الخميس .. كان عندنا وردة وفتحت ..قل أعوذ برب الفلق ..! .. مايحسد الكتب إلا أصحابها .. لا بجد ماشاء الله ...لا قوة إلا بالله .. الأغلفة جميلة ..وطبعا البنوتة الجميلة اللي على غلاف د.أحمد "حنين" ماشاء الله - كنت زمان شبهها كده! - أما بالنسبة لغلافك أولا بما إنك العريس - أقصد صاحب المدونة طبعا!- فالغلاف أجمل من الغلاف الأول في الألوان ..والرسم " واحد اسمه طارق .. عثرت على اسمه بعد جهد!" .. يعني يشد ..يعني لو واحد معاه ابنه هيقول أنا عايز من ده يا بابا :)) - والولد بعدها يطلع ضابط يفدي وادي النيل بحياته ..وأحد الأسباب كتابك!- ربنا يبارك لك ،وللأساتذة حسام " والله شكلي هنافسك وهاكتب إن شاء الله ..يوميات مدرسة في الأدغال ! " .. ولدعاء الرقيقة" غلافها بصراحة أرق غلاف" ..وللدكتور أحمد ..ربنا يجعلهم قدم السعد والخير وكل حاجة حلوة في الدنيا ..
على فكرة الكتاب كان اسمه " الأطباء لا يقولون الآه".. ولو انه ما يضرش ..كله بقى جوافة!.. عقبال ما أشوف كتبكم مترجمة ..:)) .. صباح الورد
أخي الفاضل / هشام عبية ....
كده الله ينور .... والجواب باين من عنوانه .... وواضح إنك داخل في الكتابة الساخرة وإحنا حتنيمنا من الفجر ..... وإيه 999 دي رقم الإسعاف ولا المطافي ...!!! عموماً ألف مبروك ... وبالتوفيق ....
مهندس /هيثم أبوخليل
مدونة متر الوطن بكام ...؟؟
http://metrelwatanbekam.maktoobblog.com/
الف مبروك يامحمد وعقبال السنة الجاية متنزلوا 8 كتب او 6انا مش عارفة المتتابعة بتاعتكم عاملة ازاى 246 ولا متضاعفة 248 طبعا اتمنى انها تكون متضاعفة
وانا واثقة طبعا ان كل الكتب هتكون حلوة مع انى للاسف مقرتش غير الاطباء لايقولون اه بس عجبنى جدا
وان شاء الله احاول الاقي الكتب قبل ماتخلص
الف مبروك يا باشا وعقبال الف كتاب بس هينزل المنصوره امتى ابقى احجزلى نسخه وحياه العيش والملح د.ريهام رضا
ما شاء الله
الف الف الف الف مبروك
ربنا يوفقكم جميعا ياااااااارب
بس انا مش عارفه معرض الكتاب معاده امتى
وكل سنه انوى اروح واقول بعد الامتحانات واول مااجى اروح يقولولى ده خلص خلاص
حظهم وحش كنت هشترى وانفعهم هما الخسرانييين
سلام مربع.. ومبروك مضروبه ف أربعه ليكم
وعلى رأى مروة.. أنا عايزه من ده
على فكرة يامحمد مروة عامله حملة دعائية ف كل حته.. لازم يكونلها نسبه م الأرباح
الف مبروك
فعلا الاغلفه شكلها جميل وكمان اسماء الكتب لذيذه
ربنا يسهل ويوصلوا عندنا
ربنا يوفقكوا يارب
تحياتى وتقديرى
مبروك لينا كلنا، ويا رب يوفقنا كلنا، ويا رب يا كريم تهون علينا كلنا بالأخص الغلابة اللي أول مرة يجربوا مواجهة ما كتبوه مطبوعاً وبين دفتين وكده.. وأول مرة يطلعوا بعضاً منهم للعيان خارج نطاق البيت والصحبة والأحباب... أنا عايشة في جو امتحانات وترقب من فترة طويلة.. لأ وكمان مفيش معيار نقدر نقيس بيه لأنه كله توفيق من الله.. خلاص أعصابي أنا بقت "مفرولة" زي الخميرة بتاعة نينة يا محمد!د
مبرووووووووووووووووووووك
الانسان اصله جوافه ده مشكله ههههه
الصراحه انا بحب كتاباتك جدا وحسام برده جدا
ولذلك متحمسه جدا ليوميات مدرس ف الارياف و 999
وكتابات دعاء سمير الرقيقه جداا
بالتوفيق للمجموعه باذن الله
وان شاء الله تنفذ الطبعه الاولى والتانيه كمان
بالتوفيق ياابطال
السلام عليكم
اذيك يا استاذ محمد
وكل سنه وانت طيب ويا رب تحقق كل امنياتك فى العام الجديد
والف مبروك على صدور كتابك وانا متاكد انه هيكون صاحب فكره لانى بحترم كتابتك بجد وزى مقالت الصديقه بلدياتى مروه جمعه
يا رب اشوف كتبكم مترجمه
تمنياتى لك بمزيد من التوفيق لانك تستحق كل خير بجد
ارق تحية
مدونه جميله وان شاء الله نشترى الكتاب
مع انى لم اقرء اصدراتكم ولكنى اتوسم خيرا فى الاستاد محمد عبية ان يرسل لى كتابة كهدية مثلا. وان جيت للحق انا اعتبر نفسى من متسولى الانترنت اعمل اية عايش على الشحاتة وخصوصا فى الكتب بالدات لان صعب واحد زى حالتى يشترى كتاب بس بقلك اية اوعا تفكر انى بشحت منك ومع انى استمتع لكل مواضيعك فى بص وطل علشان كدة عايز تشحتنى كتاب لو عجبنى هحوشلك حقة واهيلك ثمنة هههه فى رعاية الله صاحب الكتابة الممتعة والشيقة
مبرووووووووك
طيب فين بقى نسختى الموقعه باهداء شخصى من حضرتك وهى كالاتى
اقر انا محمد هشام عبيه المالك فكريا وانا فى كامل قوايا الكتابيه
اهداء نسخة هذا الكتاب 999 ملاكى الديزه للماضة صاحبة مشروع دكتوره عن قريب الخيرى ومن قدم شىء بداه التقاه والله على ما اقول شهيد
مبروك يا افندم على الكتاب وان شاء الله انقب عنه هو الطب اصله جوافه عشان اشوفها كانت ببذر ولا بلدى
:)
تحياتى
مبروك الكتاب وان شاء الله نجيبة عشان انت كاتب متميز
تحـياتي
شكر كبير في الأول لكل من بارك وهنأ وشجع وأسعدني بكل هذا الاهتمام
مروة جمعة:يافندم- برضه يافندم!- تشكرات من هنا لغايو الزقازيق على كل هذا الاهتمام والمودة.. نتعب لك في فرحك.. صدور كتابك الأول يعني!
هيثم أبو خليل: منور ياباشمهندس أشكرك جدا ع التشجيع والمحبة
ياسمين: أشكرك جدا ياياسمين.. المتتابعة بتاعتنا ماشية بالبركة ليس أكثر! بس ربنا يسهل وممكن ننزل حاجة في الصيف كمان يارب..لو ماقدرتيش تيجي القاهرة فالكتب موجودة في مكتبة "بوك أند بينس" في المنصورة أمام نادي جزيرة الورد أهي أقرب برضه بيتهيألي!
د.ريهام: ميرسي يافندم.. الكتب موجودة في المنصورة زي ماقلت فوق من شوية ماكنتش معانا ولا إيه!
نوسة: المعرض هيبدأ يوم الخميس 24 يناير وهيقعد أسبوعين.. مافيش حجج بقى!
هبة المنصوري:لو عايز من ده بصحيح روحي المكتبة في المنصورة.. أما نشوف المليون نسخة اللي حطينهم هناك هيخلصوا امتى!
رحيل: أشكرك جدا
دعاء سمير:عارف أنا أعصاب الخميرة المفرولة دي! أجمدي كده إن شاء الله كتابك هيعمل شغل ماحصلش.. ده عليه بصمة بالدهب!
كراكيب: الله يبااااارك فيك
د.أجدع بنوتة:أشكرك جدا ..يارب الكتب الأربعة تعجبك كلها
صالح سعيد: الله يخليك ياعم صالح.. همتك بقى معانا في ترجمة الكتب إلى اللغة السنسكيترية!
حسام يحيى: أشكرك ويسعدني جدا اقتناءك للكتب
أنينموس:أشكرك جدا ويسعدني ان ارسل لك نسخة من الكتاب بس مش لما أعرف الأول هأبعته لمين؟
لماضة: تعال المعرض وأنا هأكتب لك اهداءات على طول الكتاب وعرضه! وكتاب الأطباء طبعته الأولى خلصت ومافيش طبعة تانية دلوقت.. بس هأحاول أجيب لك نسخة
ابن ناصر:أشكرك جدا ومستني أعرف رأيك لما تقرأ الكتاب
تخيل النهاردة لسه مكتشفة المكتبة دى بما اننا النهاردة اول يوم فى الاجازة فمش بنروح وانا خدت بالى منهابس قلت مش داخلة انا رايحة معرض الكتاب وبعدين الحقيقة المكتبة دى نضيفة اوى الواحد خاف يدخلها هههههههههه
وبعدين يعنى ايه بينس اساسا ؟حبوب؟
لا اناان شاء الله هروح معرض الكتاب
والف مبروك مرة تانية
سلام
بس انا مفهمتش برضه معلش انا غبية حبتين يعنى الكتب موجودة دلوقتى فى بوك اند بينس ولسه هتيجى
اصل لو هيا موجودة خلاص يبقي اجيبها من هنا اسهل انا مش ضمنةنفسي لانى بقرر اعمل حاجات كتير ومش بعمل ولاحاجة
ايه الحلاوة دي يا فنان
ألف مبروك على الاصدارات الجديدة
مبروك يا استاذ محمد
السلسله هتكون رائعه ان شاء الله
ماشى..رحت "بوكس آن بيــنز"-على فكرة بينز مش بنس..وبينز تمشى فول ولو جرين تبقى فاصوليا ولو كيدنى تبقى لوبيا بس المقصوده الكوفى بيــــنز- مالقتش حاجه.. بس كتبت ف الاقتراحات عشان يجيبو السلسله دى
تصور لسه مخلصه كتاب د.بستانى..بس حاجه بديعه بجد..الكتاب محشى حواديت وكلها ممتعه
شكرا ياهبة علشان فهمتنيى المعنى اصل هو الواحد بس مستغرب الاسم
عموما انا رحت جبت الكتاب خلاص يامحمد بس لسه مخلصتهوش لان تقريبا كلله قريته قبل كده على بص وطل وعالمدونة وانامش بحب اقرا حاجة مرتين بس هقراه برضه مش اشتريته لازم يتقرى وجبت برضه يوميات مدرس فى الارياف بس كالعادة لقيتنى قرياه كله قبل كده لم استمتع
بتاع دعاء مش موجود وبتاع احمد عمار شكله حلو عجبانى فكرة السي دى بس مجبتوش برضه لانى ماليش فى الشعر قد كده
يالا استنى 128يمكن يطلع فيه حاجة جديده
سلام
ألف مبروك عليك و عليكوا .. أنا لسة ما رحتش المعرض بس هو ليه الجناح بتاع دار ليلى ممكن ما يبقاش فى مكانه .. ده الواحد بقى خلاص حافظ الأماكن يعنى
يعني بنحيي و بنقول الف الف مبروك لكتابنا الكبير محمد هشام باشا عبية هو و بقية مجموعة من اول السطر و باقوله من آخر السطر البولمان انا رايحة اركبه اهه عشان اجيب النسخة بتاعتي
تحياتي الجامده جدا
اخيراً لقيت مدونتك يارجل انت دوختنى ولففتنى السبع لفات علشان الاقى مدونتك واخيرا بعد معركة شرشة بينى وبين محرك جوجل عثرت عليها ولكن بعد حصار موقع الانترنت وفرض عقوبات على كل من يزعجنى وانا ابحث عنك يعم الحج انا مش عارف مبسوط قد اية انا لقيتك فى وسط الزحمة دى وهو حضرتك زانق نفسك لية كدة ومخلى نفسك فى حتة عتمة مش عارف تطلع فى حتة نور حتى يسهل العثور عليك ولكن باركلى انى بعد عذاب استمر ساعة وجدتك اصل انا خايب نت ويدوب بستهجا الحروف بقلك اية انا رايح معرض الكتاب يوم الخميس اللى جى انت هتكون موجود هناك ويارب الاقى كتابك بتاع ثلاث تسعات دة عارف انى دوشتك متزعلس من رغيى اصل اللى بحبهم دايما بكون رغاى معاهم فاستحملنى
عبدالناصر
الأجمــــــــل ...محمد باشا هشام، ممممممم بذكاءك السياسي، استطعت أن تجبرني على شراء الإنسان أصله جوافه في مقدمة 999، أو 3 تسعات، وهو رقم عزيز فعلاً لمن يسكن في السعودية ـ بالمناسب ـ إذ يدل مباشرة على البوليس .............
المهم، الكتاب جميل، وخفيف ، ولظيظ ، ويتاكل أكل
.
.
ومبروووك لدار ليلى إنها سبقت الشروق ف النشر لمدونين زي سعادتك ....حــاجـــة تطمن الواحد
.
.
تحياتي لبقية رفقاء الكفاح، والسلاح ، والمطاوي .......... وحياتي الخاصة لك
شوف بقى يا عم محمد
انا خلصت ثنائيتين من الربعايه اللى انت كاتبها وماشيه فى الثلاثيه دلوقتى
هبعت لحضرتك تعقيب مفصل عن كتابك على الميل ان شاء الله
وفى انتظار نسخت كتاب الاطباء بفارغ الصبر
ياريت تبعتلها بسرعه على ورقة عرض حال دمغه
مبروك على الاصدار
سأقرأه ان شاء الله
ممكن اي ميل الدار؟
تحياتي
فينك يامحمد؟
ده التراب ردم الدنيا
طب مين هيشترى الكتب كده وأنت راكنها ع الرف هنا من شهر؟ العنكبوت؟
على رأى المثل -اللى جدتى دايماً تقوله- نضف بيتك- قصدى بلوجك- ورشه ماتعلم مين يخشه
الف مبروك ابنك التاني يا محمد باشا
وعقبال نوبل الادب يا رب
يا باشا كتابك 999 جامد جدا ... ايه الحلاوه دى ... لا الصراحه يستاهل الخمسه جنيه وعليهم بوسه ... بص بقى انا عامل مدونة جديده اسمها شمو نشادر يا ريت تشرفنى بس انك تبصلى وتطللى عليها كده ... www.nashader.blogspot.com
انا بقي ماليش دعوة انا عاوزة نسخة مافيش دليفري
الف الف مبروك يامحمد وعقبال الكتاب المليون
المهم انا عرفت انك نزلت كتاب اخر يوم في المعرض ومالحقتش اروح اجيبه وكنت عمالة ادور علي مدونتك عشان حتي اعرف الكتاب اسمه ايه واشتريه ومحتاسة يلا هابقي ادور في المكتبات بقي او استني المعرض الجاي وابقي اشتريه
السلام عليكم ورحمه الله وبركاته ،،،
بجد ما شاء الله عليكم ومبروك ليكم كلكم ،،
أنا أول مره أدخل هنا على المدونه دى لأن لسه مشتركه جديده بالمدونات ،،
بس عجبتنى أغلفة الكتب جدا وعناوينها أيضا ،،
للأسف لم أذهب لمعرض الكتاب ذلك العام ،،
بإذن الله سأحاول متابعة كتاباتكم ،،
وفقكم الله ،، وإلى الأمام دائما ،،،
الف مبروك يافندم والله
بس ياريت تحددلنا مجموعة مكتبات نجيبها منها الله يكرمك
بالتوفيق إن شاء الله :)
يا عبيه انت طول عمرك جامد سواء فى بص وطل ولا الدستور ولا هنا .. أسامة أمين وعامل مدونة جديده اسمها شمو نشادر .. ابقى بص ..
جزاك الله خيرا
ومبروك ياباشا
الف مبروك يا استاذ محمد
ولازم هكون حريصة على شراء الكتب دى وقرائتها
إرسال تعليق
<< Home