من نفسي

بكسر النون

الاسم:
الموقع: الدقهلية- القاهرة, Egypt

الأربعاء، نوفمبر 02، 2005

السبعات..وأحلامي العبيطة


السبعات..وأحلامي العبيطة


تنفيذا لدعوة الكونتيسة غادة اللي مع نفسها دايما أكتب هذه السبعات التي وضعتني في مأزق حقيقي لأني اكتشفت أني بلا طموحات أو أحلام كبيرة..بالأحرى اكتشفت أن أحلامي عبيطة جدا..حتى شوفوا..د

سبع حاجات عايز أعملها

أكتب قصة قصيرة من تاني "آخر مرة أبريل 2004"د
أقرأ ولو 20% من الكتب اللي بشتريها وبتتركن في المكتبة
أشارك في تأسيس جريدة تابلويد محترمة الناس كلها تقرأها
أكتب سيناريو لفيلم سينمائي
أعيش في إسكندرية
اشتري عربية "ولو 128 حتى"د
أتعلم اللغة الإنجليزية "لأن كده عيب وقلة أدب كمان"د



سبع حاجات مش بعرف أعملها

لما أحب بنت أخليها تحبني!د
لما بنت تحبني أخليني أحبها!د
لما أقول كلمة بحبك لأي حد أو "حداية "بأحس أن ملهاش طعم
أقدم نفسي للناس بشكل كويس
التوقف عن الهزار في الكلام اللي بأقوله
الكتابة بلغة عربية فصحى سليمة دون أن يتململ سيبويه في قبره
لما أكون متضايق أو حزين مش بأعرف أعبر عن اللي جوايا كويس


سبع حاجات بقولهم طول الوقت

صباح الفل" أقولها لزملاء العمل في الصباح..والمساء!" د
لا والله "غير مصدق لكلام يقوله لي شخصا ما"د
إيه المزة دي؟! " لما أشوف -ولامؤاخذة- بنت حلوة في الشارع!د"
ياعم أرحمنا "لما واحد يستخف ظله علي"د
هأهأ "ضحكة عصبية ساخرة ملتصقة بمعظم – عفوا- كل كلامي!"د
ياالله ياولي الصابرين " لما تكون مقفلة مع الواحد"د
أرزاق" لما يجي وقتها..أظن معروف"د

سبع أشخاص اطلب منهم يلعبوا اللعبة دى بالترتيب الأبجدي

أحمد عمار صاحب حنين
حسام صاحب الفضفضة
عمر صاحب التجربة
لست أدري صاحبة لست أدري
ميشيل حنا صاحب مستنقعات الفحم
نعناعة صاحبة ميدان النعناع
نوران صاحبة نور القمر

15 Comments:

Blogger Doaa Samir said...

محمد،...د
أحلامك مش عبيطة، يمكن عشان في مجملها تبدو بسيطة؟!..دي جميلة من بساطتها وفي إمكانك تعملها لو هميت..د
الـ7 عايز تعملها: د
د1-إنت جواك قصص كتيرة محتاجة إنك تحط طرف قلمك على الورقة+ أشياء أخرى
د2-إن شاء الله حتى من غير ما تضطر للقراءة 3 ساعات يوميا زي نور الشريف
د3-هيحصل
د4- إنت بدأت بالفعل بس واحدة واحدة
د5-مش بعيدة
د6-بإذن المولى بس إياك تلاقي حالتها عدلة
د7-آآه.. لأنه كده مينفعش

اللي مش بتعرف تعملهم:د
د1و2 الحب بيجي كده، الواحد لا بيختاره ولا بينويه.. بس المهم إنه لا يعلّق ولا يتعلق بين السما والأرض
د3- غريبة قوي.. أمال بتقولها إزاي وليه لما إنت مش حاسسها؟!!!د
د7- ده صحيح.. إنت جواني

8:49 ص  
Blogger محمد هشام عبيه said...

دعاء: ميرسي يافندم لقراءتك الدقيقة..
وأتمنى أن ماكتبتيه بخصوص الكتابة "القصص- السيناريو" يحصل قريب إن شاء الله..بخصوص نور الشريف والثلاث ساعات قراءة..بيجيب وقت منين لأكل العيش على كده ..128 من بقك لباب السما..
بخصوص الأشياء اللي مش بأعرف أعملها..الحب والذي منه..أنا عارف أنه كده..بس عيب برضة أن كل مرة تيجي معايا خلف خلاف!..بخصوص كلمة بحبك أنا ببقى حاسسها المشكلة أن بشعر أنها أحيانا غير معبرة بالشكل الكافي..وضحت؟! أنا شخصيا مش فاهم إزاي يعني!! ماعلينا..

1:55 م  
Anonymous غير معرف said...

احلامك مش عبيطه خالص و انشاء الله تحققهم كلهم قريب جدا

11:56 م  
Blogger نعناعة said...

سبع حاجات عايزه اعملها :طب قول سبعميه
1 اتعلم اللغة اليابانيه
2 ازور اليابان
3 ابقى دكتوره فى علم الجينات
4 سري
5 ممنوع السؤال
6 هش من هنا
7 انت لسه واقف ؟؟

سبع حاجات مش بعرف اعملها
1 ابطل تناكه على خلق الله
2 ابطل احلم ان الدنيا تتقيف على مقاسي
3 اتحمس لاى حاجه
4 مافيش تانى
5 اصل انا عندى ايمان انى اقدر اعمل اى حاجه احط فى دماغى انى عايزه اعملها ... هاجيبلك منين باقى السبعه

سبع حاجات بقولهم طول الوقت
1 حاضر .. انطلاقا من المبداء الخالد 0كلمة حاضر بتريح)
2ربنا يسهل ... بما ان الناس ما بتحبش تسمع كلمه لا صريحه ولما بتقولهم
اه ما بيصدقوا
3 يمكن!!... بما ان كل شيء جايز
4 ربنا يعينك .. لما واحد يلاقى فى سكوتك الدائم فرصه لتصديع رائسك بمشاكله من يوم ما اتولد
5 يا غجر ... لما تحبك بشتيمه والادب والتناكة يمنعا الكلام الياي
6 في ايه يا شجرة الدر؟ .. لما واحدة محدثة تناكه تتنك على اصيلات التناكة الى زيي
7 كتاكيتو بنى ... لوصف شديدات السذاجه او الرقيقات بشكل بفقع المراره

سبع اشخاص ادعوهم لكتابة سبعاتهم
(طب اجيبهملك منين دول)
1 سكسكه
2 ام الخير
3 ازدحمد
4 الحاج ميسو الولف
5 الاستاذ الدكتور العميد المبجل
6 عم رجب البواب
7 ماما سوزان
وجميع الاهل والاقارب والاصدقااااااااء

سفرووووت

6:17 ص  
Blogger محمد هشام عبيه said...

تاتي: ميرسي لمرورك ويارب فعلا تتحق أحلامي اللي مش عبيطة

1:00 ص  
Blogger محمد هشام عبيه said...

منت:حمدا لله على السلامة أولا..يامرحبا يامرحبا..عاش من قرأ لك حروفا..
هايل موضوع هش من هنا وممنوع السؤال أنت لسه واقف..لأ ذوق ذوق..عموما ا،ا عارف كل حاجة واستنتجت أنت عاوزة تعملي إيه..بس مش هأقولك..
حلو قوي موضوع اليابان ده..الظاهر أننا نواجه بهجوم ياباني على المدونات ولا هجوم بيرل هاربور والدليل..تجربة عمر وغادة سامحوني مكانش قصدي..
من حقوق لعلم الجينات..أكيد هتوصلي أكيد!د
بخصوص الأشياء التي لاتستطيعين القيام بها..
كيف تتفق رقم 5 مع رقم 3 ..بس ماعلينا..
لكن يبدو أن الأزمة كلها تكمن في التناكة ..ليه بس يابنتي هو فيه حد مسلطك على خلق الله..واخدة بالك ياشجرة الدر!د
عموما سكسكة وأم الخير وعدوني أنهم هيكبتوا عن سبعاتهم..أما ماما سوزان فمشغولة اليومين دول عشان بتعمل الفول على الفطار لبابا حسني!
فوتك بعافية!د

1:07 ص  
Blogger Doaa Samir said...

أنا أعرف أم ازدحمد.. بس ما اعرفش ازدحمد نفسه... ام ازدحمد يا منت بتعرف تعمل كل حاجة ماتخطرش على بالك!!د

10:05 ص  
Blogger Lasto-adri *Blue* said...

انا بدوس على الينك بتاعك بالصدفة
*إعذرنى بقى لى كتير مدخلتش المدونات أصلا*
والبصدفة ألاقيك لسا فاكرنى... مش عارفة أقول لك إيه.. بس حاضر.. كلها يومين وتلاقى الحل ع لستُ أدرى مع إنى حليت نفس الأسئلة بس بالإنجليزى إنما عشان خطرك بس

صباحك فل

2:31 م  
Blogger محمد هشام عبيه said...

لست أدري: يافندم متحرمش منك ومن الرفاهية اللي انت معيشاني فيها..كده فعلا أنت بلوجية جدعة..لأنك عارفة الإنجليزي بتاعي قوي قد إيه بشكل قد يمثل خطرا على لغة الملك إليزابيث شخصيا!د
بخصوص دخولك بلوجي بالصدفة ولايهمك..أنا نفسي أدخل على بلوجي بالصدفة!د
بالقطع لم أنسى كتابتك المميزة خاصة أنك من أوائل الناس اللي ناغشوني في هذه المدونة الفقيرة ..
مننظر سبعاتك بالعربي..

12:01 ص  
Blogger Lasto-adri *Blue* said...

مم... الله يكرمك..
بس أنا اقصد إنى بدخل البلوج بالصدفة إنى فعلا مشغولة جدا اليومين دول..
اللهم إلا بعض التخاطيف
:D

11:52 ص  
Blogger محمد هشام عبيه said...

لست أدري: يافندم أنا متفهم ظروفك..عموما أنا مقضر في حق البلوجاوية كلهم لأني أقل واحد بيعلق على الناس ومع ذلك بلاقي ناس محترمة منهم بيميلوا على بلوجي ..يعني احراج الصراحة..وربنا يعنيك على مشاغلك..الهندسية أكيد..

8:23 ص  
Blogger Unknown said...

في حاجة غريبة
لما جيت احل اللعبةدى تقريبا السبعة الاولانين زيك بالظبط .

السبعة التانيين مختلفين ف شوية حاجات
يعنى عمرى مثلا ما جربت الحب منطرف واحد
وبتكلم عربي كويس
والسبعة اللى بتقوهم على طول بجدزيي بالظبط
خاصة يا الله ياولي الصابرين
وحتى شايفين المزة ده رغم انى موزة بنت يعنى مش ولد . اما السبع اشخاص فالحمد لله معرفهمش

5:13 م  
Blogger محمد هشام عبيه said...

جيرنيمو:شرفتيني أولا..وغريبة فعلا أن يكون فيه تطابق بين أحلامي السبعة وأحلامك السبعة..كده طبعا أحلامي معدتيش عبيطة!
أما بخصوص الكلمات السبع اللي أنا بأقولها وأنت برضه بتقوليهم..فدي بقى حاجة تخوف..طبعا بتضحكي الضحكة الساخرة دي إزاي!
أما بخصوص إحم ولا مؤاخذة موضوع المزة..فوالله دي بتطلع تلقائي..وكونك برضه بتقوليها فدي يعني أن الحالة اللي عندي طبيعية!

12:18 م  
Blogger Omar Mostafa said...

محمد يا هشام.. انت راجل جميل

9:44 ص  
Anonymous غير معرف said...

يامحمد ماتقولش ان دى احلام عبيطه دى احلام نقيه وبريئه جدا
فيها ملامح كتيرة من الطفوله , حتى ملامحك طفوليه لحد بعيد واوعى تزعل ماحدش يطول فى دنيانا دى يكون بطهر ونقاء الطفوله .
وبعدين انت ليه مستعجل على الحب ! بس لو عايز رأى اخت لك اكبر منك ارتبط بمن تكون بتحبك لان المرأة لما تحب وترتبط بحبيبها حاتعمل المستحيل لسعادت بس طبعا انت تقدر ده مش تطنشها !!
اما باقى احلامك فاإن شاء الله حاتحققها فى يوم قريب وممكن جدا تنشىء الجريدة اللى عايزها مع مجموعه شباب موهوب زيك ده مش شىء صعب .اما انك مش بتحس بكلمه الحب ماتقولهاش لانى مقتنعه بأن اللى بيحب يعبر عن معناها بالتصرف مش بقصايد
احلامك جميله وبسيطه فى زمان كله قتل ودم ودبح وتعذيب . يبقى ازاى ربنا ما يحققهاش لك ؟؟
قول يارب .
نيفين عمر

1:28 م  

إرسال تعليق

<< Home